உலகை அச்சுறுத்தும் கொரோனா வைரஸ் - வீழ்ச்சியை சந்தித்து வரும் சீன பொருளாதாரம்

இரும்பு உருக்கு உற்பத்தியில் உலகிலேயே சீனா முதலிடத்தில் உள்ள நிலையில்,  மூலப்பொருட்களும், உதிரி பாகங்களும் கிடைக்காமல் பல நிறுவனங்கள் உற்பத்தியை நிறுத்தி வைத்துள்ளதாக தெரிய வந்துள்ளது.

ஆப்பிள், பாக்ஸ்கான், நிசான், ஹூண்டாய் உள்ளிட்ட நிறுவனங்கள் சீனாவில் இருந்து இறக்குமதி செய்யும் உதிரிபாகங்களை நிறுத்தி உள்ளன.

உலக ஸ்மார்ட்போன் வர்த்தகத்தில் சீனா பெரும் ஆதிக்கம் செலுத்தி வரும் நிலையில், கொரோனா அச்சம் காரணமாக ஸ்பெயின் நாட்டில் நடைபெற வேண்டிய சர்வதேச மொபைல் வர்த்தக கண்காட்சி ரத்து செய்யப்பட்டுள்ளது.

சீனாவுக்கு சுற்றுலா செல்வதற்கு பல நாடுகளும் தடை செய்துள்ளதால், விமான நிறுவனங்களுக்கு சுமார் 40 ஆயிரம் கோடி ரூபாய் வரை இழப்பு ஏற்பட்டுள்ளதாக சர்வதேச பொருளாதார அமைப்பு கூறியுள்ளது.

ஜப்பான், தாய்லாந்து, சிங்கப்பூர் நாடுகளுக்கான சுற்றுலா பொருளாதாரமும் தேக்கம் அடைந்துள்ளது. 

மருந்துகளுக்கான தட்டுப்பாடு நிலவுவதால், சுமார் 40 சதவீதம் வரை விலை உயர்ந்துள்ளதாகவும் கூறப்படுகிறது.

இந்த அச்சம் காரணமாக, புழக்கத்தில் உள்ள பழைய நாணய நோட்டுகளை அழிப்பதற்கும் அந்த நாடு முடிவு செய்துள்ளது.

 

கொரோனா வைரஸ் மனிதர்களுக்கு மட்டுமல்ல, உலக வர்த்தகத்துக்கும் அபாய மணி அடித்துள்ளதாகவே வல்லுநர்கள் தெரிவிக்கின்றனர்.