2020... இப்போது மட்டுமல்ல... இன்னும் எத்தனை ஆண்டுகள் கழித்து பின்னோக்கி பார்த்தாலும், மிகப்பெரிய அழிவை சந்தித்த ஆண்டு என்றே வரலாற்றில் பதிவாகியிருக்கும்  2020 ஆம் ஆண்டு....ஒன்றா இரண்டா எண்ணிலடங்கா சோகங்களை உள்ளிடக்கிய இந்த ஆண்டிலும், விரல் விட்டு எண்ணும் ஒரு சில ஆரோக்கியமான சம்பவங்களும் அரங்கேறத்தான் செய்தன...அப்படி தமிழகத்திற்கு கிடைத்த ஒரு ஆறுதல் பரிசு நடராஜன்...சேலம் மாவட்டம் சின்னப்பம்பட்டியில் பிறந்த ஒரு ஏழைச்சிறுவன்... இன்று சிட்னியை சுற்றிப்பார்த்துக்கொண்டிருக்கிறான் என்றால் சும்மாவா... விவரம் தெரிந்த‌து முதலே ஊரில் விளையாட்டுத்தனமாக கிரிக்கெட்டில் மூழ்கிய  நடராஜனுக்கு, கிரிக்கெட் என்ற விளையாட்டே 20 வயதில் தான் தெரிந்திருக்கிறது...நீயெல்லாம் கிரிக்கெட்டில் சாதிப்பது எளிதல்ல என மற்றவர்கள் கூறிக்கொண்டிருக்க, எனக்கு பிடிக்கும் நான் விளையாடுகிறேன் என எதிர்பார்ப்பே இல்லாமல் விளையாட்டில் வெறி பிடித்தவராய் திரிந்திருக்கிறார் நட்டு....அவரது நம்பிக்கைக்கு பலனாய் வந்து சேர்ந்த‌து டி.என்.பி.எல்... இடது கையில் நடராஜன் வீசும் யார்க்கர்கள் பேட்ஸ்மேன்களை திக்குமுக்காடச்செய்ய, சேவாக் வரை கவனம் பெற்றார் நடராஜன்... சேவாக்கின் உதவியால், 2017 ஆம் ஆண்டிலே பஞ்சாப் அணிக்கு ஏலம் போனாலும், அவருக்கு தேவையான வாய்ப்பு கிடைத்த‌து என்னவோ ஐ.பி.எல் இல் தான்... சன் ரைசர்ஸ் ஐதராபாத் அணிக்காக களமிறங்கி கலக்கினார் நடராஜன்...  இதனால் நடராஜனை ஆஸ்திரேலியாவிற்கு எதிரான தொடரில் சேர்க்க வேண்டிய நிர்பந்தமும் ஏற்பட்டது. இருந்தபோதும், வலைப்பயிற்சிக்காகத்தான் ஆஸ்திரேலியாவிற்கு அழைத்துச்செல்லப்பட்டார் நடராஜன்...ஆஸ்திரேலிய தொடருக்கு தேர்வு செய்யப்பட்ட மற்றொரு தமிழக வீர‌ர் வருண் சக்ரவ‌ர்த்தியின் கெட்ட நேரம், நடராஜனுக்கு நல்ல நேரமாக அமைந்த‌து...  காயம் காரணமாக தொடரில் இருந்து வருண் வெளியேற, 15 பேருக்கான பட்டியலில் நட்டுவிற்கு இடம் கிடைத்த‌து. ஆனாலும் ப்ளேயிங் லெவனில் இடம் என்பது எட்டாக்கனிதான்...  ஆஸ்திரேலியாவுடன் ஒருநாள் போட்டி... 2 க்கு 0 என தொடரை கைப்பற்றி கொக்கரித்துக்கொண்டிருந்த‌து ஆஸ்திரேலிய அணி... தொடர் தான் போய்விட்டதே, விளையாடாத வீர‌ர்களுக்கு வாய்ப்பு கொடுப்போம் என்ற கோலியின் கரிசனத்தில் மைதானத்தில் காலடி பதித்தார் நம் நட்டு...அந்த போட்டியில் 2 விக்கெட் வீழ்த்தினார் நடராஜன்... அந்த விக்கெட்டுகளை தமிழகமே கொண்டாடியது... அதன் பின்னர் 20 ஓவர்கள் போட்டியில் களமிறக்கப்பட்ட நடராஜன், முதல் போட்டியில் 3 , 2 வது போட்டியில் 2 என முக்கியமான விக்கெட்டுகளை வீழ்த்தி இந்திய அணி வெற்றிக்கு உதவினார். இந்திய அணியும் தொடரை கைப்பற்றியது...