ராமேஸ்வரம் மீனவர்கள் 7 பேர் கைது : இலங்கை கடற்படை முகாமில் வைத்து விசாரணை

ராமேஸ்வரத்திலிருந்து நேற்று 500-க்கும் மேற்பட்ட விசைப்படகுகளில் சுமார் 3 ஆயிரத்துக்கும் மேற்பட்டோர், மீன்பிடிக்க கடலுக்கு சென்றனர். இந்தநிலையில் ஆரோக்கிய அம்மாள் என்பவருக்கு சொந்தமான விசைப்படகில் சென்றவர்கள் மீன்பிடித்து விட்டு, திரும்பி வரும்போது, படகில் பழுது ஏற்பட்டுள்ளது. அந்த படகை, மற்றொரு படகில் சென்ற மீனவர்கள், கயிறு கட்டி, சர்வதேச எல்லை வரை இழுத்து வந்தனர். அப்போது அந்த வழியே ரோந்து வந்த இலங்கை கடற்படையினரை பார்த்த மீனவர்கள், பழுதான படகையும், அதில் இருந்த மீனவர்களையும் அங்கேயே விட்டு விட்டு ராமேஸ்வரம் திரும்பினர். இதைத்தொடர்ந்து, எல்லை தாண்டி வந்ததாக கூறி, பழுதான படகையும், அதில் இருந்த மீனவர்கள் 7 பேரையும், இலங்கை கடற்படையினர் சிறைபிடித்தனர். மன்னார் கடற்படை முகாமிற்கு கொண்டு சென்று 7 மீனவர்களிடம், இலங்கை கடற்படையினர் விசாரணை நடத்தி வருகின்றனர்.