ஆலங்குடி வட்டாட்சியரை சிறைபிடித்த மக்கள்

புதுக்கோட்டை மாவட்டம் ஆலங்குடி அருகே உள்ள கொத்தமங்கலம், கீரமங்கலத்தில் புயலால் ஏற்பட்ட சேதங்களை பார்வையிட ஆலங்குடி வட்டாட்சியர் ரெத்தனாவதி தலைமையில் வருவாய் துறை அதிகாரிகள் சென்றனர். புயல் பாதிக்கப்பட்டு இரண்டு நாள் கழித்து தாமதமாக ஆய்வு பணிக்கு வந்ததாக கூறி, வட்டாட்சியர் வாகனத்தை சிறைபிடித்து அப்பகுதி பொதுமக்கள் போராட்டம் நடத்தினர். தகவலறிந்து வட்டாட்சியரை மீட்க சென்ற டி.எஸ்.பி. அய்யனார் தலைமையிலான போலீசாருக்கும், பொது மக்களுக்கும் இடையே மோதல் ஏற்பட்டுள்ளது. இதில் காயமடைந்த டி.எஸ்.பி. அய்யனார் மருத்துவமனையில் அனுமதிக்கப்பட்டு உள்ளார்.