கர்நாடக விவசாயிகளுக்காக கே.ஆர்.எஸ். அணையிலிருந்து 2 டி.எம்.சி. தண்ணீர் திறந்துவிட வேண்டும் : சதானந்த கவுடா கோரிக்கை

கர்நாடக விவசாயிகளுக்காக கே.ஆர்.எஸ். அணையிலிருந்து 2 டி.எம்.சி. தண்ணீர் திறந்துவிட வேண்டும் என்று மத்திய அமைச்சர் சதானந்த கவுடா காவிரி மேலாண்மை ஆணையம் மற்றும் மத்திய நீர்வளத்துறை அமைச்சகத்துக்கு கடிதம் எழுதியுள்ளது சர்ச்சையை ஏற்படுத்தியுள்ளது. காவிரியிலிருந்து தமிழகத்திற்கு இம்மாதம் 9 புள்ளி 19 டி.எம்.சி தண்ணீரை திறக்க வேண்டும் என்று காவிரி மேலாண்மை ஆணையம் உத்தரவிட்ட நிலையில் அதனை கர்நாடக அரசு நிறைவேற்றவில்லை. மாறாக கபினி மற்றும் கே.ஆர்.எஸ். அணைகளில் இருந்து வெளியேறும் உபரிநீர் என்ற வகையில் தற்போது வரை 1 புள்ளி 7 டி.எம்.சி. தண்ணீர் மட்டுமே கிடைத்துள்ளதாக தெரிகிறது. டெல்லியில் நேற்று நடைபெற்ற காவிரி மேலாண்மை ஆணையத்தின் ஒழுங்காற்று குழு கூட்டத்தில் கர்நாடக அணைகளில் நீர் இருப்பு குறைவாக உள்ளதால் தமிழகத்திற்கு உரிய தண்ணீர் திறக்கப்படவில்லை என்று கர்நாடக தரப்பில் தெரிவிக்கப்பட்டது குறிப்பிடத்தக்கது.