பிரதமர் மோடிக்கு நடிகர் ரஜினி பாராட்டு

* ஆங்கில வார இதழ் ஒன்றுக்கு நடிகர் ரஜினிகாந்த் சமீபத்தில் அளித்துள்ள பேட்டியில், தமிழகத்துக்கு நல்ல தலைமை தேவை எனவும் தலைமைக்கான வெற்றிடம் இருப்பதாகவும் கூறியுள்ளார். 

* தமிழர்கள் கடின உழைப்பாளிகள், அறிவாளிகள் என குறிப்பிட்டுள்ள ரஜினி, தாங்கள் யார் என்பதை அவர்கள் மறந்து போய் இருப்பதாக கூறியுள்ளார். மேலும், அரசியலையும் சினிமாவையும் ஒருபோதும் தான் இணைத்து பார்த்ததில்லை எனவும் தெரிவித்துள்ளார். 

* பொழுதுபோக்கு விஷயமான சினிமாவில் அரசியல் கொண்டு வரக்கூடாது எனவும், சில படங்களில் அரசியல் வசனங்கள் இருப்பது கூட, வேண்டுமென்றே வைத்தது அல்ல எனவும் கூறியுள்ளார். 

* சினிமா நடிகர்கள், அரசியலில் வெற்றி பெற முடியும் என நிரூபித்து காட்டியவர் எம்ஜிஆர் என பாராட்டியுள்ள ரஜினி, சினிமாவில் இருந்து வருபவர்களுக்கு எம்ஜிஆர் ஒரு முன்னுதாரணம் என குறிப்பிட்டுள்ளார். 

* ஜெயலலிதாவின் உறுதி, தன்னம்பிக்கையை பாராட்டியுள்ள ரஜினிகாந்த், ஆண்கள் நிறைந்த அரசியல் உலகில் தனித்து நின்றவர் ஜெயலலிதா என தெரிவித்துள்ளார். 

* கமல்ஹாசன் தனது நண்பர் எனவும் அவரை அரசியல் போட்டியாக கருதவில்லை எனவும் ரஜினிகாந்த் கூறியுள்ளார். 

* பிரதமர் மோடி பற்றி கருத்து தெரிவித்த ரஜினி, நாட்டுக்கு நல்லது செய்ய மோடி நினைக்கிறார் எனவும், அதற்காகவே, கடினமாக முயற்சித்து பல்வேறு செயல்களை செய்வதாகவும் குறிப்பிட்டுள்ளார். 

* மக்களுக்கு சிறந்ததை கொடுக்க பிரதமர் மோடி முயற்சிக்கிறார் எனவும் ரஜினிகாந்த் பாராட்டியுள்ளார். 

* இன்னும் முழுமையாக அரசியலுக்கு வரவில்லை என தெரிவித்துள்ள ரஜினி, மாற்று அரசியலை உருவாக்க விரும்புவதாகவும் குறிப்பிட்டுள்ளார். 

* அதே சமயம் அரசியல் என்பது ஆபத்தான விளையாட்டு எனவும் அதில் கவனமாக விளையாட வேண்டும் எனவும் ரஜினிகாந்த் தெரிவித்துள்ளார்.