உதகை அருகே தோடர் பழங்குடியின தம்பதியினரின் திருமண நிகழ்ச்சி பாரம்பரிய முறைப்படி வெகு சிறப்பாக நடைபெற்றது.

நீலகிரி மாவட்டத்தில் வசித்து வரும் தோடர் பழங்குடியின மக்கள், இன்றளவும் தங்கள் முன்னோர் பின்பற்றிய கலாச்சாரத்தையே பின்பற்றி வருகின்றனர். இந்தநிலையில் தோடர் பழங்குடியினத்தை சேர்ந்த முதல் வழக்கறிஞரான நந்தினி மற்றும் ஆனந்த் குமாரின் வில்- அம்பு சாஸ்திரம் என அழைக்கப்படும் திருமண நிகழ்ச்சி விமரிசையாக நடைபெற்றது. நிகழ்ச்சியின் போது மணமகனும், மணமகளும் நிகழ்ச்சியில் பங்கேற்றவர்களிடம் ஆசிர்வாதம் வாங்கினர். பின்னர் நாவல் மரத்தில் நெய் விளக்கேற்றிய நந்தினி, மணமகன் வருகைக்காக காத்திருந்தார். அப்போது வனப்பகுதியில் இருந்து செடியை வில் அம்பாக வளைத்து கொண்டுவரவே. நந்தினி அதனை நெய் விளக்கின் முன் வைத்து வழிபட்டார். இதனைத்தொடர்ந்து வில்-அம்பு சாஸ்திரம் நிறைவடைந்தது. இதனையடுத்து திருமணத்தில் பங்கேற்ற தோடர் இன மக்கள், வட்டமாக நின்று ஆடி, பாடி மகிழ்ந்தனர்.