வேலூர் மாவட்டம், குடியாத்தம் அரசு பள்ளியி​ல் ஏற்கனவே பத்தாம் வகுப்பில் தேர்வாகி, பாஸ் செய்த மாணவருக்கு மீண்டும் தேர்வெழுத ஹால் டிக்கெட் வந்துள்ளது.

வளத்தூர் அரசு மேல்நிலைபள்ளியில் 6 ம் வகுப்பு முதல் 12 ஆம் வகுப்பு வரை 500 - க்கும் மேற்பட்ட மாணவ மாணவிகள் பயின்று வருகின்றனர்.
இந்நிலையில் இப்பள்ளியில் 10 ஆம் வகுப்பு பயின்ற மாணவன் கணேசன், தேர்ச்சி பெறவில்லை என ஆசிரியர்கள் கூறியதாக கூறப்படுகிறது. இதனால் அவரது தாயாருடன் அந்த மாணவன் மீண்டும் அதே பள்ளியில் பத்தாம் வகுப்பில் சேர்ந்து படித்துள்ளார். தற்போது பத்தாம் வகுப்பு தேர்விற்கு கணேசனுக்கு  ஹால் டிக்கெட் வந்த நிலையில், தற்போது அந்த மாணவன், பத்தாம் வகுப்பில் ஆல் பாஸ் முறையில் தேர்ச்சி பெற்றது தெரிய வந்துள்ளது. இதனால், தேர்வு எழுத வேண்டாம் என பள்ளி தலைமை ஆசிரியர் கூறியதாக மாணவன் கணேசன் தெரிவித்துள்ளார்.
அரசு பள்ளி நிர்வாகத்தின் மெத்தன போக்கால் அரசு பள்ளியில் ஏற்கனவே பத்தாம் வகுப்பு தேர்ச்சி பெற்ற மாணவனுக்கு மீண்டும் அட்மிஷன் வழங்கி பத்தாம் வகுப்பு பொதுதேர்வுக்கு ஹால் டிக்கெட் வந்தது  பள்ளி மாணவர்கள் மற்றும் பெற்றோர்களிடையே பெரும் அதிர்ச்சியை ஏற்படுத்தியுள்ளது. தற்போது மாணவன் கணேசனின் எதிர்காலம் கேள்விக்குறியாக உள்ளது.