அப்படியொரு எண்ணமே மத்திய அரசுக்கு இல்லை என மத்திய உள்துறை இணை அமைச்சர் கிஷன் ரெட்டி கூறுகிறார். புதுச்சேரி அரசியல் என்னதான் நடக்கிறது? பார்க்கலாம்.பிரெஞ்சு - இந்திய ஒப்பந்தத்தின் அடிப்படையில், 1954ம் ஆண்டு புதுச்சேரி, காரைக்கால், ஆந்திரத்தை ஒட்டிய ஏனாம், கேரளத்தை ஒட்டிய மாஹே ஆகிய நான்கு பகுதிகளும் இந்தியாவுடன் இணைந்தன.இவை அடங்கிய புதுச்சேரி யூனியன் பிரதேசத்தின் தனித்தன்மை பாதுகாக்கப்படும் என, அப்போதைய பிரதமர் நேரு வாக்குறுதி தந்தார்.இதற்கிடையே,1979ல் பிரதமர் மொரார்ஜி தேசாய், தமிழகத்துடன் புதுச்சேரியை இணைக்கும் நடவடிக்கையை தொடங்கினார். இதற்கு, அப்போதைய தமிழக முதல்வர் எம்.ஜி.ஆரும் ஆதரவளித்தார்.இதை எதிர்த்து வெடித்த மாபெரும் போராட்டம், மத்திய அரசை பின்வாங்கச் செய்தது. நாற்பது ஆண்டுகள் கடந்துவிட்ட நிலையில், தற்போது மீண்டும் இந்த விவகாரம் தலை தூக்கி இருக்கிறது.ஏற்கனவே, துணை நிலை ஆளுநர் கிரண் பேடிக்கும், முதல்வர் நாராயணசாமி அரசுக்கும் இடையே அதிகார மோதல் நீடிக்கிறது. அரசின் கோப்புகளுக்கு துணைநிலை ஆளுநர் பரிசீலனைக்குப் பிறகே அனுமதி கிடைப்பதால், நலத்திட்டங்களை நிறைவேற்ற முடியவில்லை என்பது புதுச்சேரி முதல்வரின் குற்றச்சாட்டு.இதைக் கண்டித்து அவ்வப்போது போராட்டங்களும் நடத்தப்படுகின்றன. வரும் 8ஆம் தேதி ஆளுநர் மாளிகையை முற்றுகையிட இருப்பதாக, ஆளும் காங்கிரஸ் கட்சி அறிவித்துள்ளது.இந்தப் பிரச்சனைக்குத் தீர்வு, புதுச்சேரிக்கு மாநில அந்தஸ்து பெறுவது மட்டுமே என்ற முழக்கங்களும் நீண்ட நாட்களாக இருந்து வருகின்றன.இதற்கு மத்தியில்தான், புதுச்சேரியை தமிழகத்துடன் இணைக்க, பிரதமர் முயற்சிப்பதாகவும், சட்டமன்றம் இல்லாத யூனியன் பிரதேசமாக புதுச்சேரியை மாற்றிவிடுவார்கள் என்றும் புதுச்சேரி முதல்வர் நாராயணசாமி தொடர்ந்து குற்றம்சாட்டி வருகிறார்.புதுச்சேரியை தமிழ்நாட்டுடன் இணைக்க மாட்டோம்"

இதற்கு பதிலளிக்கும் விதமாக, புதுச்சேரியில் நடைபெற்ற பாஜக பொதுக்கூட்டத்தில் பேசிய மத்திய உள்துறை இணை அமைச்சர் கிஷன் ரெட்டி, புதுச்சேரியை பிற மாநிலங்களோடு இணைக்கும் எண்ணம், மத்திய அரசுக்கு இல்லையென திட்டவட்டமாக தெரிவித்தார்.ஆனால், அரசியல் காரணங்களுக்காகவே, இதுபோன்ற குற்றச்சாட்டுகளை முதல்வர் நாராயணசாமி முன்வைத்து வருவதாக தெரிவிக்கிறார், நாடாளுமன்ற முன்னாள் உறுப்பினர் ராமதாஸ்...

கடந்த நான்கரை ஆண்டுகளாக மக்கள் நலத் திட்டங்களை செயல்படுத்தாமல், முதல்வர் நாராயணசாமி இதுபோன்ற குற்றச்சாட்டுகளையே சுமத்துகிறார் என்கிறார், பாஜக மாநில தலைவர் சாமிநாதன்...

புதுச்சேரி முதல்வர் நாராயணசாமியோ, மத்திய அரசும், துணை நிலை ஆளுநர் கிரண்பேடியும், தங்களது அரசை முடக்கி, புதுச்சேரியை தமிழகத்துடன் இணைக்கும் முதற்கட்ட பணியைத் தொடங்கி விட்டதாக குற்றம்சாட்டுகிறார்.