குஜராத் முதலமைச்சர் விஜய் ரூபானி ராஜினாமா

65 வயதாகும் விஜய் ரூபானி, கடந்த 2016ஆம் ஆண்டு முதல் குஜராத்தின் முதலமைச்சராக பணியாற்றி வந்தார். இந்நிலையில், காந்திநகரில் உள்ள ராஜ்பவனில், ஆளுநர் ஆச்சார்யா தேவ்ரத்தை நேரில் சந்தித்த அவர், தனது ராஜினாமா கடிதத்தை அளித்தார். இதையடுத்து பேசிய விஜய் ரூபானி, குஜராத் முதலமைச்சராக பணியாற்ற வாய்ப்பு தந்த பிரதமர் மோடிக்கு நன்றி தெரிவித்தார். அடுத்த ஆண்டு குஜராத் சட்டப்பேரவை தேர்தல் நடைபெற உள்ள நிலையில், விஜய் ரூபானியின் இந்த திடீர் ராஜினாமா பரபரப்பை ஏற்படுத்தி உள்ளது. இந்நிலையில், துணை முதல்வராக உள்ள நிதின் பட்டேல், அடுத்த முதலமைச்சராக பதவியேற்க வாய்ப்புள்ளதாக கூறப்படுகிறது. சமீபத்தில் பாஜக ஆளும் கர்நாடகாவில் எடியூரப்பாவும், உத்தராகண்டில் தீரத் சிங் ராவத்தும் முதலமைச்சர் பதவியில் இருந்து மாற்றப்பட்ட நிலையில், தற்போது குஜராத்தில் விஜய் ரூபானி ராஜினாமா செய்துள்ளார்.