பா.ஜ.க.வில் இணையும் திட்டமில்லை - புதுச்சேரி அமைச்சர் நமச்சிவாயம் விளக்கம்

புதுச்சேரி அமைச்சர் நமச்சிவாயம் பா.ஜ.க.வில் இணைய உள்ளதாக தகவல் வெளியான நிலையில், தமது ஆதரவாளர்களுடன் அவர் ஆலோசனை நடத்தியதால் பரபரப்பு உருவாகி உள்ளது.புதுச்சேரியில் 2016-ல் நமச்சிவாயத்தை முன்னிறுத்தி தேர்தலை சந்தித்த காங்கிரஸ் கட்சி,  முதலமைச்சராக நாராயணசாமியை தேர்வு செய்தது.  இதனால் நமச்சிவாயம் அதிருப்தி அடைந்தார். இந்நிலையில்,  கடந்த ஆண்டு நமச்சிவாயம் வகித்த மாநில காங்கிரஸ் கட்சி தலைவர் பதவியும் பறிக்கப்பட்டது.  இதனால் மேலும் அதிருப்தி அடைந்த அவர் கட்சி நிகழ்ச்சிகளை தொடர்ந்து புறக்கணித்து வந்தார். அவ்வப்போது கட்சி தலைமை சமாதானப்படுத்திய நிலையில் அமைச்சர் நமச்சிவாயம் தற்போது, பா.ஜ.க.வில் இணைய போவதாக தகவல் வெளியாகியது.  இந்நிலையில் அமைச்சர் நமச்சிவாயம் தனது ஆதரவாளர்களுடன் வில்லியனூர் பகுதியில் உள்ள திருமண மண்டபத்தில் ஆலோசனை நடத்தினார். பின்னர் செய்தியாளர்களிடம் பேசிய அமைச்சர் நமச்சிவாயம், வழக்கமாக நடத்துவது போன்று தன்னுடைய ஆதரவாளர்களுடன் ஆலோசனை நடத்தியதாகவும், பா.ஜ.க.வில் தற்போது இணையும் எண்ணம் இல்லை என தெரிவித்தார்.