கேரளாவில் பிரபல நடிகை கடத்தப்பட்ட விவகாரம் : பெண் நீதிபதியை இடமாற்றம் செய்த உத்தரவு ரத்து

கேரளாவில் பிரபல நடிகை கடத்தல் வழக்கு விசாரணையைமேற்கொண்டு வந்த பெண் நீதிபதி இடமாற்றம் செய்யப்பட்ட நிலையில், வழக்கு விசாரணை பாதிப்புக்குள்ளாகும் என காரணம் காட்டி இடமாற்ற உத்தரவு ரத்து செய்யப்பட்டது. கடந்த 3 ஆண்டுகளுக்கு முன் பிரபல மலையாள நடிகை காரில் கடத்தப்பட்ட சம்பவம் கேரளாவில் பரபரப்பை ஏற்படுத்தியது. இந்த வழக்கை விசாரித்த உயர்நீதிமன்றம் கடந்த ஆண்டு, பெண் நீதிபதி ஹணி வர்கீஸ் என்பவரை நீதிபதியாக, நியமித்து உத்தரவிட்டது. வழக்கு நடைபெற்று வந்த நிலையில், வர்கீஸை கோழிக்கோட்டுக்கு இடமாற்றம் செய்து உத்தரவு பிறப்பிக்கப்பட்டது. இந்த இடமாற்ற உத்தரவால்  நடிகையின் கடத்தல்  வழக்கு விசாரணை பாதிப்புக்குள்ளாகும் எனவும் மற்றொரு பெண் நீதிபதியை உடனடியாக நியமிக்க முடியாது எனவும் காரணம் காட்டி ஹணி வர்கீஸின் இடமாற்ற உத்தரவு ரத்து செய்யப்பட்டது.  ஏற்கனவே இவ்வழக்கின் விசாரணை ஆறு மாதங்களுக்குள் முடிக்க வேண்டும் என உச்சநீதிமன்றம் அறிவுறுத்திய நிலையில் பல்வேறு காரணங்களால் விசாரணை இன்னும் முடிவுக்கு வரவில்லை. நடிகையிடம் குறுக்கு விசாரணை நடைபெற்று வந்த நிலையில், கொரோனா காரணமாக கடந்த இரு மாதங்களுக்கு மேலாக விசாரணை நடைபெறவில்லை.