ரஃபேல் விமான கொள்முதல் தொடர்பாக நாடாளுமன்ற கூட்டுக் குழு விசாரணை வேண்டும் - காங்கிரஸ்

உச்சநீதிமன்ற தீர்ப்பு குறித்து பா.ஜ.க.வோ பிரதமரோக மகிழ்ச்சி அடையத் தேவையில்லை என்று காங்கிரஸ் கட்சி தெரிவித்துள்ளது. இந்த பிரச்சனையில் நாடாளுமன்ற கூட்டுக் குழு விசாரணை தான் சரியானது என காங்கிரஸ் மூத்த தலைவர் ஆனந்த் சர்மா தெரிவித்துள்ளார். இதேபோல, டெல்லியில் செய்தியாளர்களிடம் பேசிய திரிணாமுல் காங்கிரஸ் எம்.பி., சவுகதா ராய், தனக்கு சரியானது எது என கருதியதோ அதையே உச்சநீதிமன்றம் தெரிவித்துள்ளது என்றும், ரஃபேல் விவகாரத்தில் நாடாளுமன்ற கூட்டுக் குழு விசாரணை வேண்டும் என அரசியல் கட்சிகள் விரும்புவதாகவும் தெரிவித்தார். உச்சநீதிமன்ற தீர்ப்பு தொடர்பாக சீராய்வு மனுதாக்கல் செய்வது குறித்து விவாதித்து முடிவு செய்யப்படும் என மனுதாரர்களில் ஒருவரும், மூத்த வழக்கறிஞருமான பிரசாந்த் பூசன் தெரிவித்துள்ளார். 

இந்தநிலையில் இந்த விவகாரத்தில் அரசியல் லாபத்திற்காகவே, காங்கிரஸ் கட்சி ஆதாரமற்ற குற்றச்சாட்டுகளை கூறி வருவதாக மத்திய அமைச்சர் ராஜ்நாத் சிங் விமர்சித்துள்ளார். இதனிடை​யே, உச்சநீதிமன்ற தீர்ப்பை ரிலையன்ஸ் குழுமத்தின் தலைவர் அனில் அம்பானி வரவேற்றுள்ளார். 

டெல்லியில் செய்தியாளர்களிடம் பேசிய அவர், இந்த விவகாரத்தில் பாரம்பரியமிக்க காங்கிரஸ் கட்சியால் மக்கள் தவறாக வழிநடத்தப்பட்டதாகவும், இந்த தீர்ப்பு அரசியலில் பொய்யை அவிழ்த்துவிட்டவர்களின் கன்னத்தில் விழுந்த அடி என்றும் அமித்ஷா தெரிவித்துள்ளார். ராகுல்காந்திக்கு இந்த குற்றச்சாட்டை சுமத்த எங்கிருந்து ஆதாரம் கிடைத்தது என்பது குறித்து அவர் விளக்கம் அளிக்க வேண்டும் என்றும் அமித்ஷா வலியுறுத்தி உள்ளார்.  காங்கிரஸ் கட்சியிடம் ஆதாரங்கள் இருந்தால் உச்சநீதிமன்றம் செல்ல வேண்டியது தானே என்றும், நாடாளுமன்றத்தில் விவாத்துக்கு பின்னர் தான் நாடாளுமன்ற கூட்டுக்குழு அமைக்கப்படும் எனவும், ரஃபேல் ஒப்பந்தம் தொடர்பாக விவாதத்துக்கு தயாரா என்றும் அமித்ஷா கேள்வி எழுப்பியுள்ளார்.