ஓடிடியிலா? திரையரங்கிலா? - ஜகமே தந்திரம் படக்குழுவிற்குள் பனிப்போர்

ஜகமே தந்திரம் திரைப்படத்தின் தயாரிப்பாளர் ச‌சிகாந்த், படத்தின் நடிகர் தனுஷை டுவிட்டரில் அன்பாலோவ் செய்துள்ளார். இதன் மூலம் இருவருக்கும் இருந்த பனிப்போர் உறுதி செய்யப்பட்டுள்ளது... அப்படி என்ன தான் பிரச்சினை அவர்களுக்குள்....

ஒய்நாட் ஸ்டூடியோஸ் மற்றும் ரிலையன்ஸ் எண்டர்டெயிண்ட் ஆகிய நிறுவனங்கள் இணைந்து தயாரித்துள்ள 'ஜகமே தந்திரம்'  திரைப்படத்தை, கார்த்திக் சுப்புராஜ் இயக்கியுள்ளார். தனுஷ், ஹாலிவுட் நடிகரான ஜேம்ஸ் காஸ்மோ, ஐஸ்வர்யா லக்‌ஷ்மி உள்ளிட்டோர் முக்கிய கதாபாத்திரத்தில் நடிக்கின்றனர். சந்தோஷ் நாராயண‌ன் இசையில் உருவாகியுள்ள இந்த திரைப்படம் கடந்த ஆண்டு மே மாதமே திரையரங்குகளில் வெளியாகும் என அறிவிக்கப்பட்டது.  ஆனால் கொரோனா ஊரடங்கு ரிலீஸ் தேதியை தள்ளிபோட்டது.... 

அன்று முதல் கிட்டத்தட்ட ஓராண்டாகவே இதோ ரிலீஸ் அதோ ரிலீஸ் என தள்ளிபோய்க்கொண்டே இருந்த‌து ஜகமே தந்திரம் திரைப்படம். இறுதியாக பொங்கலன்று ரிலீஸ் ஆகும் என எதிர்பார்த்து காத்திருந்த ரசிகர்கள், ரிலீஸ் ஆகாத கடுப்பில், ஜெகமே தந்திரம், ஷேம் ஆன் யூ ஒய் நாட் ஆகிய ஹேஸ்டேக்குகளை ட்ரெண்ட் செய்தனர். இந்த நிலையில், தனுஷ் ரசிகர்களுக்கு மற்றொரு பேரதிர்ச்சியாக, நெட்பிளிக்ஸ் என்னும் ஓடிடி தளத்திற்கு படத்தை விற்றுவிட்டதாக தகவல் வெளியானது.

ஆனால் திரையரங்கில் தான் வெளியிட வேண்டும் என்ற விருப்பத்துடன் இத்தனை மாதங்களாக காத்திருந்த தனுஷ், இதற்காகவே மாஸ்டர் திரைப்படத்தை திரையரங்கில் வெளியிடுவது என்று படக்குழு முடிவு செய்த போது தன் ஆதரவை தெரிவித்திருந்தார். இந்த நிலையில், ஜகமே தந்திரம் திரைப்படம் திரையரங்கில் வெளியாக வேண்டும் என நான் விருப்ப‌ப்படுகிறேன் என பகிரங்கமாகவே தன் எதிர்ப்பை டுவிட்டரில் பதிவிட்டார். விநியோகஸ்தர்கள், திரையரங்க உரிமையாளர்களின் விருப்பமும் அது தான் எனவும் தனுஷ் குறிப்பிட்டிருந்தார். 

இந்த நிலையில், டுவிட்டர் மற்றும் இன்ஸ்டாகிராமில் தனுஷை அன்பாலோவ் செய்துவிட்டார் படத்தின் தயாரிப்பாளர் ச‌சிகாந்த்.. இதன் காரணமாகவே அரசல்புரசலாக பேசப்பட்டு வந்த இவர்களது பிரச்சினை  வெளிச்சத்துக்கு வந்துள்ளது. ரகிட ரகிட பாடலுக்கு திரையரங்கில் ஆட்டம் போட காத்திருக்கும் தனுஷ் ரசிகர்களுக்கு, டுவிஸ்ட் கொடுக்குமா படக்குழு...

தந்தி தொலைக்காட்சி செய்திகளுக்காக சினிமா செய்தியாளர் ராஜா....