விஜய் சேதுபதிக்கு வலுக்கும் எதிர்ப்பு - எதிர்ப்புகளை தாண்டி எடுத்த முடிவில் உறுதி

ஒரு நடிகர் என்பதையும் தாண்டி , சிறந்த மனிதர் என ரசிகர்களால் கொண்டாடப்படுபவர் விஜய் சேதுபதி .ரசிகர்களை சந்திக்கும்போதெல்லாம் முத்தங்களை வாரி வழங்கி பாசத்தை வெளிப்படுத்துவார். ஆனால் தற்போது ரசிகர்களின் எதிர்ப்பை மீறி கிரிக்கெட் வீரர் முத்தையா முரளிதரன் கதாபாத்திரத்தில் நடிக்கும் முடிவை அவர் எடுத்துள்ளது அனைவரையும் ஆச்சர்யத்தில் ஆழ்த்தியுள்ளது. எம்.எஸ்.ஸ்ரீபதி இயக்கத்தில் 800 என்ற படத்தில் தான் இலங்கை கிரிக்கெட் வீரர் முத்தையா முரளிதரனாக , விஜய் சேதுபதி நடிக்கிறார். அந்த படத்தின் மோஷன் போஸ்டரும் வெளியாகியுள்ளது.

முத்தையா முரளிதரன் தமிழ் குடும்பத்தில் பிறந்தவர், தலை சிறந்த பந்து வீச்சாளர் என்ற பெருமைகள் ஒருபுறம் இருந்தாலும், இலங்கை அதிபர் கோட்டாபய ராஜபக்சவின் ஆதரவாளராக இருப்பது தான்  பிரச்சனை. 

இலங்கையில் நடந்த போர்க்குற்றங்களில் முக்கிய பங்கு வகித்ததாக குற்றச்சாட்டுக்கு ஆளானவர் கோட்டாபய ராஜபக்ச. தமிழர்களுக்கு எதிரானவர் என்ற முத்திரையும் அவர் மீது உள்ளது. ஆனால், ஒரு தமிழராக தான் எந்த பிரச்சனையையும் சந்தித்தது இல்லையென்றும், இலங்கையின் அதிபராக இருக்க சரியான நபர் கோட்டாபய ராஜபக்ச என்றும் பேசியிருந்தார் முத்தையா முரளிதரன். மேலும், இலங்கையில் பல லட்சம் ஈழத்தமிழர்கள் கொன்று குவிக்கப்பட்ட போது அதிபராக இருந்த மஹிந்த ராஜபக்சவை, நெல்சன் மண்டேலாவுடன் ஒப்பிட்டு பேசியிருந்ததாகவும் முரளிதரன் மீது குற்றச்சாட்டு உள்ளது.இப்படிப்பட்ட நபரின் கதாபாத்திரத்தில் விஜய் சேதுபதி நடிக்க கூடாது என இலங்கை தமிழர்கள் , தமிழகத்தில் உள்ள ரசிகர்கள், அரசியல் கட்சிகள் உட்பட பலரும் எதிர்ப்பு தெரிவித்துள்ளனர். #BoycottVijaySethupathi , #Boycott800 என்று சமூக வலைதளத்தில் ஹேஷ்டேக்கையும் உருவாக்கியுள்ளனர். தென் மேற்கு பருவக்காற்று படத்தில் விஜய் சேதுபதியை ஹீரோவாக அறிமுகப்படுத்திய இயக்குனர் சீனு ராமசாமியும், டவீட் மூலம் தனது எதிர்ப்பை பதிவு செய்துள்ளார். சில நாட்களுக்கு முன்பு ஆன்லைன் வர்த்தகத்தை ஆதரிக்கும் வகையில் விளம்பரத்தில் நடித்ததற்காக எதிர்ப்பை சம்பாதித்த விஜய் சேதுபதி, தற்போது புதிய சிக்கலில் மாட்டியுள்ளார். மக்கள் செல்வன் என்று ரசிகர்களால் அழைக்கப்படும் நடிகர், மக்களிடம் பெயரை கெடுத்துக்கொள்ள கூடாது என்பது அவரது ரசிகர்களின் விருப்பமாக உள்ளது.