தனது கதையை புத்தகமாக எழுதியுள்ள ப்ரியங்கா சோப்ரா

நடிகை ப்ரியங்கா சோப்ரா தனது வாழ்க்கை கதையை UNFINISHED  என்ற பெயரில் புத்தகமாக எழுதியுள்ளார். சிறு வயதில் இந்தியாவில் இருந்ததில் தொடங்கி, இளம்வயதில் படிப்பிற்காக அமெரிக்கா சென்றது, அங்கு நிறவெறி தாக்குதலை எதிர்கொண்டது, மீண்டும் இந்தியாவுக்கு திரும்பி உலக அழகி பட்டம் வென்றது, பாலிவுட் மற்றும் ஹாலிவுட்டில் வெற்றிகரமான நடிகையாக மாறியது வரை பல சுவாரஸ்யங்கள் இந்த புத்தகத்தில் இடம்பெற்றுள்ளன. தற்போது இந்த புத்தகத்தை பெறுவதற்கான முன்பதிவு தொடங்கியுள்ள தகவலை புத்தகத்தின்அட்டை படத்தை வெளியிட்டு அவர் தெரிவித்துள்ளார். அமெரிக்காவில் இந்த புத்தகத்தின் விலை 28 டாலர். விரைவில் இந்தியாவிலும் வெளியாக உள்ளது.

ஹாலிவுட் நடிகர் ராக் , 101வது பிறந்தநாள் கொண்டாடும் தனது பாட்டிக்கு "ஹேப்பி பர்த்டே" பாடிய வீடியோவை வெளியிட்டுள்ளார். தன்னை வீடியோ காலில் பார்த்தவுடன் தனது பாட்டி ஹேர்ஸ்டைலை சரி செய்து கொள்ளும் அழகை மிகவும் ரசிப்பதாக ராக் தெரிவித்துள்ளார். இந்த வீடியோவின்போது தன்னை சுற்றி யாரும் இல்லை என்பதை காட்டிய பிறகு , மாஸ்கை நீக்கிவிட்டு ராக் பாடுவதை ரசிகர்கள் பாராட்டி வருகின்றனர்.

தெலுங்கு நடிகர் அல்லு அர்ஜுனுக்கு நம்மூரிலும் ரசிகர்கள் உள்ளனர். கடந்த 2004ம் ஆண்டு மறைந்த, இவரின் தாத்தா அல்லு ராமலிங்கையா நகைச்சுவை நடிகராக பல படங்களில் நடித்தவர். சினிமா மீது தனது குடும்பத்திற்கு உள்ள காதலையும் தாத்தாவை கௌரவிக்கும் வகையிலும், தாத்தாவின் பிறந்தநாளன்று தனது ஸ்டூடியோவின் கட்டுமான பணிகளை தொடங்கி உள்ளதாக புகைப்படம் வெளியிட்டு மகிழ்ச்சியை பகிர்ந்துள்ளார் அல்லு அர்ஜுன்.

மாதவன் - அனுஷ்கா இருவரும் இணைந்து "ரெண்டு" என்ற படத்தில் நடித்திருந்தனர். தற்போது இந்த ஜோடி மீண்டும் "சைலென்ஸ்" என்ற திகில் படத்தில் நடித்துள்ளது. ஹேமந்த் மதுக்கர் இயக்கத்தில் உருவாகியுள்ள இந்த படத்தில் நடிகைகள் அஞ்சலி மற்றும் ஷாலினி பாண்டேவும் முக்கிய கதாப்பாத்திரங்களில் நடித்துள்ளனர். எதிர்பார்ப்பை ஏற்படுத்தியிருந்த இப்படம் தமிழ் மற்றும் தெலுங்கு மொழிகளில் OTT-யில் வெளியாகியுள்ளது. 

விக்ரம் - கௌதம் வாசுதேவ் மேனன் கூட்டணியில் உருவாகும் "துருவ நட்சத்திரம்" மீது மிகப்பெரிய எதிர்பார்ப்பு உள்ளது. ரசிகர்களுக்கு மிகவும் பிடித்த கௌதம் - ஹாரிஸ் ஜெயராஜ் கூட்டணியில் "ஒரு மனம்" என்ற பாடல் விரைவில் வெளியாக உள்ளதாக கௌதம் மேனன் அறிவித்துள்ளார். இதற்காக ஒரு போஸ்டரும் வெளியிடப்பட்டுள்ளது. ரித்து வர்மா கதாநாயகியாக நடித்துள்ள இந்த படத்தில் பார்திபன் , சிம்ரன், ராதிகா, ஐஷ்வர்யா ராஜேஷ் உள்ளிட்டோர் முக்கிய கதாப்பாத்திரங்களில் நடித்துள்ளனர்.